Álttá sámi giellaguovddáža doaimmat

Sámegielkursa

Mii leat 2008 rájes lágidan sámegielkurssaid Álttás ja olggobealde Álttá. Min kurssain oahpat sámegiela ja sámi kultuvrra. Don sáhtát váldit eksámena ja oaččut oahppočuoggáid. Mis leat hárjánan sámegiel oahpaheaddji. Oahpaheaddji lea bargan sámegielkurssaiguin giellaguovddážis badjel 10 jagi ja sávva juohke čavčča buresboahtima ođđa studeanttaide geat háliidit oahppat sámegiela.

Mii leat 2023 čakčii pláneme 100- diibmosaš eahketkurssa. Dát kursa lea fálaldat gosa galgá álki searvat, ja oahppat giela aktivitehtaid bokte. Eambbo dieđut bohtet sierra čállosis.

Mis lea maid ovttasbargu UiT, ja fállat SAM-1031 ja SAM-1034 kurssaid. Dáin kurssain sáhttá váldit eksámena jus háliida.

Eambbo dieđuid kurssaid birra oaččut Lisas (lisa@alttasg.no) dahje Marit Kirsten (post@alttasg.no)

Sámás mánáin

Sámás mánáin lea sámegielat deaivvadanbáiki sidjiide geat leat máná vuordime, aitto šaddan váhnemiidda ja smávvamánnábearrašiidda geain leat mánát gaskal 0- 6 jagi. Mii lágidit oanehis deaivvademiid main leat iešguđet lágan fáttát. Fálaldat lea sámegielat deaivvadanbáikki smávvamánáide, gos sámi musihkka, lávlun ja juoigan deattuhuvvo.

Prošeavtta ulbmil lea veahkehit bearrašiid válljet sámegiela ruovttugiellan, ja válljet sámegielat mánáidgárde- ja skuvlafálaldaga mánáide Álttás- ja dieđusge maid fállat sámegielat deaivvadanbáikki unnimusaide.

Mii hupmat sámegiela gaskaneaset, ja mánáiguin. Muhtin deaivvadeamit leat dárogillii, erenoamážit go ulbmiljoavku leat váhnemat. Juovlamánus lágideimmet ”váibmogiela” seminára ja dát lei dárogillii. Dán semináras gulaimet ahte mánát eai leat giellaáktivistát. Sii hupmet dan giela maid lea lunddolaš hupmat. Jus sis ii leat dárbu sámegiella hupmat, de eai daga dan. Danin lea sámás mánáin arena gos mánáin galgá leat dárbu hupmat sámegiela.

Prošeaktajođiheaddji lea Sara Karen Elle Eira, tlf 93823648

Prošeaktamielbargi lea Malin Johanne Klingenberg

Mánáideahket

Mánáideahket lea sámegielat doaibmafálaldat sámegielat mánáide gaskal 6-12 jagi. Deaivvademiin leat iešguđet lágan doaimmat ja sámegiella ja sámi kultuvra deattuhuvvo.

Min ulbmil lea nannet ja viidáset fievrridit sámegielat mánáid giela, kultuvrra ja identitehtadovddu, fállat sámegielat astoáigefálaldaga ja láhčit dili nu ahte sámegielat mánát geat orrot iešguđet báikkiin  Álttás besset deaivvadit ja oahpásmuvvat.

Prošeaktajođiheaddji lea Sara Karen Elle Eira, tlf 93823648

Prošeaktamielbargi lea Malin Johanne Klingenberg

Mearregáttemánát

Mearragáttemánát lea sámegielat doaibmafálaldat heivehuvvon dárogielat mánáide gaskal 6- 12 jagi. Mihttomearri lea nannet giela, kultuvrra ja identitehtadovddu sámi mánáin sámegielat astoáiggedoaimma bokte ja láhčit dili nu ahte sámi mánát geat orrot iešguđet báikkiin Álttás deaivvadit ja oahpásmuvvet.

Sámás muinna

Sámás muinna lea prošeakta mii heive buohkaide geat háliidit sámástit. Ulbmil lea deaivvadit eará sámegielagiiguin seammás go oahpásmuvvat lagasbirrasii.

Eambbo dieđut bohtet.

Gávcci jahkodaga

Háliidatgo oahppat ja vásihit Sámiid Gávcci jahkodaga?

Sámiin lea “gávcci jahkodaga”. Jahkodagat leat čatnon bohcco lundui ja bargguide mat gullet boazodollui: giđđageassi, geassi, čakčageassi, čakča, čakčadálvi, dálvi, giđđa dálvi, giđđa. Álttá Sámi Giellaguovddáš lea dán čavčča álggahan prošeavtta mas lea ulbmil oahppat ja vásihit Sámiid Gávcci jahkodaga doaimmaid bokte mat leat árbevirolaččat gullevaččat jahkodagaide. Mii lágidit gávcci deaivvadeami main leat árbevirolaš barggut čatnon boazodollui. Deaivvadeamit galget leat arena gos sámegiella ja kultuvra gullo ja oidno.

Prošeakta heive buohkaide geat háliidit sámástit. Lea bearrašiidda ja ovttaskasolbmuide.

Jus háliidat searvat, sádde dieđu prošeaktajođiheaddjái Marehii, tlf nr 46 66 75 71

Vuosttaš deaivadeapmi:

Dál lea čakčageassi, ja dalle lea áigi njuovvat sarváid ovdal ragaha. Vuosttaš deaivvadeamis galgat fitnat gárddehuhtte ja oahppat njuovvat ja mo ávkkástala bohcco biebmun ja ávdnasiin.

Áigi: 01.10.22

Báiki: Áisaroaivi

Nubbi deaivvadeapmi:

Nuppi deaivvadeamis galgat oahppat goarrut gápmagiid. Gámagoarrun lea golbmabeaivve guhkkosaš kursa (eahkediid ja vahkkoloahpa) go galgat oahppat mo dikšu gápmasiid ja goarrut gápmagiid alccat dahje muhtimii.

Áigi:
03.11.22-05.11.22 ja ođđajagimánnu

Goalmmát deaivvadeapmi:

Bossegohppemárkanat leat árbevirolaččat lágiduvvon dán jahkodagas. Dohko bukte sápmelaččat bohccobierggu, guoli, dujiid ja ávdnasiid maid lonuhedje mearraguliin, jáfuin ja sohkkariin jna. Bossegohppemárkanat ain lágiduvvojit Álttás Skábmamánu, ja dat geasuhit olbmuid miehta Finnmárkku.

Goalmmát deaivvadeapmi:
Mii vuolgit duos Álttá Museai diibmu 11.00. geahččat ođđa čajalmasa.
Diibmu 11.15 muitala Álttá Musea Bossegobimárkan historjjá. Dan maŋŋil min vuolgit Bossegobimárkaniidda fárrolaga.

Áigi: 19.11.2022

Njealjját deaivvadeapmi:
Mii deaivvadit giellaguovddážis njuovvat niestebohcco ja márfut. Dát heive ollesolbmuide ja joavkkuide. Dieđiheapmi: prosjekt@alttasg.no (čále galle olbmo servet). Ráddjejuvvon sajit ja geatnegahtti dieđiheapmi.

Dán prošeavtta leaba Seastinbáŋkku ja Fefo ruhtadan.

#Sparebank1 #samfunnsløftet og #Finnmarkseiendommen