Álttá sámi giellaguovddáža doaimmat

Álttá sámi giellaguovddáš lágida iešguđet lágan fásta doaimmaid mánáide, nuoraide ja ollesolbmuide. Unnimusat 30 %  min doaimmain galgá leat sámegiela oahpahus ollesolbmuide ja 70 % doaimmain galget  leat giellaarenat mánáide ja ollesolbmuide. Dás sáhtát lohkat eambbo min prošeavttaid birra.

Sámegielkursa UiTas

Mii leat 2008 rájes lágidan sámegielkurssaid Álttás ja olggobealde Álttá. Min kurssain oahpat sámegiela ja sámi kultuvrra. Don sáhtát váldit eksámena ja oaččut oahppočuoggáid. Mis leat hárjánan sámegiel oahpaheaddji. Oahpaheaddji lea bargan sámegielkurssaiguin giellaguovddážis badjel 10 jagi ja sávva juohke čavčča buresboahtima ođđa studeanttaide geat háliidit oahppat sámegiela.

SAM-1031 ja SAM-1034

Mis lea ovttasbargu UiT, ja fállat SAM-1031 ja SAM-1034 kurssaid. Dáin kurssain sáhttá váldit eksámena jus háliida. Dieđut dáppe:

Søke opptak og melde seg til eksamen UiT_høsten2023

Eambbo dieđuid kurssaid birra oaččut Marit Kirsten (post@alttasg.no)

Sámegiel eahketkursa

Eahketkursa čakčat

100- diibmosaš eahketkursa álgá borgemánus. Dát kursa lea fálaldat gosa galgá álki searvat, ja oahppat giela aktivitehtaid bokte.

Eambbo dieđuid kurssaid birra oaččut Marit Kirsten (post@alttasg.no)

Sámás mánáin

Sámás mánáin lea sámegielat deaivvadanbáiki sidjiide geat leat máná vuordime, aitto šaddan váhnemiidda ja smávvamánnábearrašiidda geain leat mánát gaskal 0- 6 jagi. Mii lágidit oanehis deaivvademiid main leat iešguđet lágan fáttát. Fálaldat lea sámegielat deaivvadanbáikki smávvamánáide ja váhnemiidda.

Mii hupmat sámegiela gaskaneaset, ja mánáiguin. Muhtin deaivvadeamit leat dárogillii, erenoamážit go ulbmiljoavku leat váhnemat. Juovlamánus 2021 lágideimmet ”váibmogiela” seminára ja dát lei dárogillii. Dán semináras gulaimet ahte mánát eai leat giellaáktivistát. Sii hupmet dan giela maid lea lunddolaš hupmat. Jus sis ii leat dárbu sámegiella hupmat, de eai daga dan. Danin lea sámás mánáin arena gos mánáin galgá leat dárbu hupmat sámegiela.

Mánáideahket

Mánáideahket lea sámegielat doaibmafálaldat sámegielat mánáide gaskal 6-12 jagi. Deaivvademiin leat iešguđet lágan doaimmat ja sámegiella ja sámi kultuvra deattuhuvvo.

Min ulbmil lea nannet ja viidáset fievrridit sámegielat mánáid giela, kultuvrra ja identitehtadovddu, fállat sámegielat astoáigefálaldaga ja láhčit dili nu ahte sámegielat mánát geat orrot iešguđet báikkiin  Álttás besset deaivvadit ja oahpásmuvvat.

Mearregáttemánát

Mearragáttemánát lea sámegielat doaibmafálaldat heivehuvvon dárogielat mánáide gaskal 6- 12 jagi. Mihttomearri lea nannet giela, kultuvrra ja identitehtadovddu sámi mánáin sámegielat astoáiggedoaimma bokte ja láhčit dili nu ahte sámi mánát geat orrot iešguđet báikkiin Álttás deaivvadit ja oahpásmuvvet.

Sámás muinna

Sámás muinna lea prošeakta mii heive buohkaide geat háliidit sámástit. Ulbmil lea deaivvadit eará sámegielagiiguin seammás go oahpásmuvvat lagasbirrasii.

Eambbo dieđut bohtet.

Gávcci jahkodaga

Háliidatgo oahppat ja vásihit Sámiid Gávcci jahkodaga?

Sámiin lea “gávcci jahkodaga”. Jahkodagat leat čatnon bohcco lundui ja bargguide mat gullet boazodollui: giđđageassi, geassi, čakčageassi, čakča, čakčadálvi, dálvi, giđđa dálvi, giđđa. Álttá Sámi Giellaguovddáš lea 2022 čavčča álggahan prošeavtta mas lea ulbmil oahppat ja vásihit Sámiid Gávcci jahkodaga doaimmaid bokte mat leat árbevirolaččat gullevaččat jahkodagaide. Mii lágidit gávcci deaivvadeami main leat árbevirolaš barggut čatnon boazodollui. Deaivvadeamit galget leat arena gos sámegiella ja kultuvra gullo ja oidno.

Prošeakta heive buohkaide geat háliidit sámástit. Lea bearrašiidda ja ovttaskasolbmuide.

Jus háliidat searvat, sádde dieđu prošeaktajođiheaddjái Marehii, tlf nr 46 66 75 71

Dán prošeavtta leaba Seastinbáŋkku ja Fefo ruhtadan.

#Sparebank1 #samfunnsløftet og #Finnmarkseiendommen